Yazıçı Vaqif Sultanlının kitabı yayınlandı
İyul 29
12:02
2024
Bu günlərdə
yazıçı-ədəbiyyatşünas Vaqif Sultanlının yaradıcılığı haqqında "Dənizlə sahil
arasında” adlı kitab yayınlanıb. "Turan evi” nəşriyyatında yayınlanan kitaba müəllifin
həyat və yaradıcılıq yolundan bəhs edən müxtəlif səpkili araşdırmalar – yubiley
yazıları, esselər, ədəbi portretlər, tanıtım məqalələri, xatirələr daxil
edilmişdir. Yazıçının doğumunun altmış beş illiyinə həsr olunmuş kitabın tərtibçisi
və yayına hazırlayanı gənc yazar Fidan Vahid, redaktoru filologiya elmləri
doktoru, professor Bədirxan Əhmədlidir.
"Dənizlə sahil arasında” kitabına Azərbaycan,
Türkiyə, Özbəkistan, Qazaxıstan, Misir, Böyük Britaniya, Koreya, Rusiya və
başqa ölkələrin alimlərinin Vaqif Sultanlı haqqında yazıları yer almışdır.
Bunların içərisində Azərbaycan müəlliflərindən Rais Rəsulzadənin "Mənalı ömür
yolu”, Əli Şamilin "Vaqif Sultanlının həyatının bəzi anları”, Almaz Əliqızının
"Zolaqlı yuva”nın sakinləri”, Cavanşir Yusiflinin "Küldən təpəcik olmaz”, Bədirxan
Əhmədlinin "Vaqif Sultanlı portretinin bəzi cizgiləri”, Müzahim İsmayılzadənin
"Vaqif Sultanlının "Qul bazarı”, Elnarə Akimovanın "Ədəbi tənqid diskursu:
bütöv Azərbaycan məramı ilə”, Salidə Şərifovanın "İnsan dənizi”nin
problematikası və bədii üslub palitrası”, Ağaverdi Xəlilin "Vaqif Sultanlının
"Kilidli dönüş” hekayəsində dönüş konsepti”, Sürəyya Sultanovanın "Bir ömrün özəti”,
İradə Musayevanın "Vaqif Sultanlının "Səhra savaşı” romanı haqqında”, Osman Fərmanoğlunun
"Uzaq illərin yaxınlığı – təsadüflər yazısı”, Yusif Yusiflinin "Sənətlə elmin vəhdəti”,
Eluca Atalının "Zamanından üstün ziyalı”, Samirə Məmmədlinin "Söz savaşı, səhra
günəşi, yaxud axına qarşı”, İlahə Dadaşovanın "Azərbaycan mühacirət ədəbiyyatı:
başlanğıcdan günümüzədək”, Fərhad Mədətovun "Vaqif Sultanlının "Səhra savaşı”
romanında fəlsəfi motivlər”, İlhamə Qəsəbovanın "Öyrədənlərin öyrədəni: Vaqif
Sultanlı”, Xəyalə Zərrabqızının "Tək bir insan dənizi”, Şahnaz Kamalın "Mənim
elmdə atam”, Ruhəngiz Sultanovanın "Mənim müəllimim”, Fəxriyyə İsayevanın
"İnsan dənizi”ndə tənhalaşan qəhrəman”, Gülay Tahirlinin "Kölgə tənhalığı”,
Cansel Cavidin "Fenomenal yaddaş tapıntısı”, Nəzrin Rəsulzadənin "Ölümsüz”,
Fidan Vahidin "Dənizlə sahil arasında...”,
Sel Canın "Həyat, Qələm və Ölüm, ”Fəxriyyə Yüksəlin "Vaqif Sultanlının
"İnsan dənizi” romanında şəxsiyyətin ikiləşməsi”, Elmir Həsənin "Ölüm yuxusu” və
"Ölmək asan deyil” əsərlərində ölüm mövzusunun mahiyyəti”, Nəzrin Mirzəlinin
"Adsız qəhrəmanların taleyi” yazıları diqqəti çəkir.
Kitaba daxil
edilmiş Əhməd Sami Elaydinin (Misir) "Keçmiş və gələcək arasında zaman
metaforası”, Pərvanə Bayramın (Türkiyə) "Tarixə işıqtutan bir hekayə: "Kulikovo
savaşı”, Burak Sarıcının (Türkiyə) "İnsan dənizi” romanı haqqında incələmə”, Alsu
Kamaliyevanın (Tatarıstan), "Azərbaycan postmodern romanında fəlsəfi bir
arayış”, Salavat İshakovun (Rusiya) "Tarixçinin bir neçə sözü”, Min Can Kimin
(Koreya) "Vaqif Sultanlının sönmüş ulduzları”, Bakıtgül Kuljanovanın
(Qazaxıstan) "Yaxşılığın özgələşməsi yoxdur”,
Xurşidə Qədirovanın (Özbəkistan) "Həyat və xəyalların inikası”, Mixail
Brannokun (Böyük Britaniya) "Tərs axın” kitabı ilə bağlı düşüncələr” və başqa
yazılar müəllifin yaradıcılığına yanaşma tərzinin fərqliliyi ilə maraq doğurur.
Kitabın mühüm
özəlliklərindən biri məqalələrin yazıldığı dildə təqdim olunmasıdır.
Qeyd edək ki,
Bakı Dövlət Universitetinin Azərbaycan ədəbiyyatı tarixi kafedrasının
professoru olan Vaqif Sultanlı "İnsan dənizi”, "Səhra savaşı”, "Ölüm yuxusu”
romanlarının, "Sönmüş ulduzlar”, "Qul bazarı”, "Heçlik vadisi”, "Tərs axın”
adlı hekayələr toplusunun müəllifidir. Onun elmi-nəzəri araşdırmaları "Ağır
yolun yolçusu”, "Azadlığın üfüqləri”, "Ədəbi-nəzəri illüstasiyalar”, "İstiqlal
sevgisi”, "Ömrün nicat sahili”, "Azərbaycan mühacirət ədəbiyyatı”, "Azərbaycan ədəbi
tənqidi”, "Azərbaycan mühacirət ədəbiyyatı: başlanğıcdan günümüzədək” və başqa
kitablarda əksini tapmışdır. Vaqif Sultanlı həmçinin tərcümə yaradıcılığı ilə də
məşğul olmuş, Sergey Jitomirskinin "Surakuzlu alim” tarixi romanını, Rəşad Nuri
Güntəkinin "Yarpaq tökümü” və "Dəyirman” romanlarını, Məhəmməd Əmin Rəsulzadənin
"Panturanizm haqqında” kitabını, habelə bir sıra dünya yazıçılarının hekayələrini
Azərbaycan türkcəsinə çevirmişdir. Müəllifin bədii və elmi əsərləri dünyanın
bir sıra dillərinə çevrilərək yayınlanmışdır.
