Suriyada kütləvi məzarlıqlardan 780 cəsəd tapılıb – Əsəd dövründə öldürülüblər
Yanvar 29
14:06
2025
Bəşər Əsəd rejiminin devrilməsindən sonra Suriyadakı kütləvi məzarlıqlardan 780-dən çox cəsəd tapılıb.
Məlumata görə, kütləvi məzarlıqlardakı cəsədlərin çoxunun şəxsiyyəti hələ də müəyyən edilməyib. Məhkəmə-tibb qrupları şəxsiyyəti, ölüm səbəbini və mümkün ailə uyğunlaşmalarını müəyyən etmək üçün cəsədləri araşdırmağa başlayıb.
BMT bildirib ki, kütləvi məzarlarda aparılan məhkəmə-tibbi qazıntılar və sübutların tədqiqi minlərlə itkin düşmüş məhbusun taleyinin üzə çıxarılmasında mühüm rol oynayacaq.
"AzPolitika” xəbər verir ki, bu barədə "Ağ Dəbilqəlilər” könüllü mülki müdafiə qrupu məlumat yayıb.
Zirzəmilərdə tapılan cəsədlərin bəzilərində ağır işgəncə izlərinin olduğu, bəzilərinin isə yandırılaraq öldürüldüyü müəyyən edilib.
Birləşmiş Millətlər Təşkilatının Suriya üzrə Araşdırma Komissiyasının dərc etdiyi son hesabatda Əsəd rejiminin sistematik edamları və işgəncə üsulları təfərrüatlı şəkildə öz əksini tapıb. Hesabatda rejimin məhbuslara qarşı sistematik işgəncə və edam üsulları arasında elektrik şoku, yandırma, diş çıxarma, şikəst etmə, cinsi zorakılıq, qəsdən tibbi laqeydlik və psixoloji işgəncə kimi dəhşətli tətbiqlər olduğu qeyd edilib.
