Seysmoloji Xidmət Mərkəzinin "izi-tozu" olmayan MMC-lərlə şübhəli satınalmaları
İyun 13
10:39
2023
Azərbaycan Milli Elmlər Akademiyası nəzdində Respublika Seysmoloji Xidmət Mərkəzi 2022-ci ilin noyabr ayının 30-da sifarişçi olduğu iki satınalmaya yekun vurub.
Qlobal.az xəbər verir ki, bu satınalmaların ümumi məbləği 57.525 manat təşkil edib.
Mərkəzin 2022-ci ilin noyabr ayının 30-da smetası 47.725 manat olan "Abadlıq işlərinin satınalınması" lotu üzrə sifarişçi olduğu satınalmada "FLONDEX" Məhdud Məsuliyyətli Cəmiyyəti qalib elan edilib.
"FLONDEX" Məhdud Məsuliyyətli Cəmiyyəti 2022-ci ilin may ayının 5-də dövlət qeydiyyatına alınıb. "FLONDEX" MMC-nin hüquqi ünvanı qeyri-dəqiqdir - Binəqədi rayonu, 7 mkr, ev 11 B, mənzil 0 ünvanıdır. Bu MMC-nin qanuni təmsilçisi Fətullayev Romal Şakir oğludur.
Mərkəzdə abadlıq işləri aparacaq "FLONDEX" MMC-nin fəaliyyət profili, maddi-texniki bazası, işçilərinin sayı, əlaqə ünvanları barədə açıq internet resurslarında məlumat yoxdur.
Seysmoloji Xidmət Mərkəzi 2022-ci ilin noyabr ayının 30-da yekun vurduğu daha bir satınalma "Proqram və proqram təminatlarının satınalınması" lotu üzrə keçirilib. Bu satınalmanın məbləği 9800 manat, qalibi isə "KASTELLUM CORPORATED" Məhdud Məsuliyyətli Cəmiyyəti olub. "KASTELLUM CORPORATED" MMC Seysmoloji Xidmətin sifarişçi olduğu digər satınalmada qalib elan edilən "FLONDEX" MMC ilə eyni tarixdə - 2022-ci ilin may ayının 5-də dövlət qeydiyyatına alınıb. Bu şirkətin də hüququ ünvanı Seysmoloji Xidmətin sifarişçi olduğu digər satınalmada qalib elan edilən "FLONDEX" MMC-nin hüquqi ünvanı kimi qeyri-dəqiqdir - SABUNÇU RAYONU, E.SARATOV, ev 67, m. 0.
İlginc məqamlardan biri isə Seysmoloji Xidmət Mərkəzinə proqram təminatı xidməti göstərəcək "KASTELLUM CORPORATED" MMC-nin özünün web ünvanının olmamasıdır. Eyni zamanda bu şirkətin də fəaliyyət profili, müvafiq lisenziyaları barədə açıq internet resurslarında məlumat verilmir.
Fəaliyyət profilləri barədə məlumat olmayan, eyni tarixdə yaradılan, hüquqi ünvanları naməlum olan MMC-lərin Seysmoloji Xidmət Mərkəzi 2022-ci ilin noyabr ayının 30-da yekun vurduğu satınalmalarda qalib elan edilmələri ortaya bir sıra suallar çıxarır.
Respublika Seysmoloji Xidmət Mərkəzinin baş direktoru Qurban Yetirmişli
Qlobal.az məsələ ilə bağlı Seysmoloji Xidmət Mərkəzindən mövqe öyrənib.
SXM-nin açıqlamasında deyilir: "2022 – ci ilin noyabr ayının 30 da abadlıq işləri üzrə kotirovka sorğusunda aşağıdakı iştirakçılar olublar: 1 "Qlobal Finans” MMC, "FLONDEX” MMC və "Menecment” MMC 2. Proqram təminatı üzrə kotirovka sorğusunda isə "KASTELLUM CORPORATED” MMC, "Menecment Expert-85” MMC və "İNTER CORPORATED” MMC olubdur. Azərbaycan Respublikası İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinin elektron portalında müvafiq ödəniş etdikdən sonra istənilən sahibkarlıq fəaliyyəti ilə məşğul olanlar iştirak etmək hüququ əldə etmiş olurlar. Satınalmalar haqqında Azərbaycan Respublikası Qanununun 27.5-ci maddəsinə uyğun olaraq qalib subyekt aşağı qiymət verən və meyarlara uyğun gələn seçilir. Bu baxımdan abadlıq işləri üzrə satınalmalarda aşağı qiymətlə çıxış edən "FLONDEX” MMC qalib seçilmişdir. Proqram təminatı üzrə isə "KASTELLUM CORPORATED” MMC qalib seçilmişdir. Tərtib edilmiş protokollar İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətində yoxlamadan keçib qeydə alınmışdır. Göstərilənlərə əlavə etmək istəyirik ki, qalib MMC bank zəmanəti verdikdən və işi gördükdən sonra ödəniş əldə edir.Ötən illərdə 2020, 2021, 2022-ci ildə yerinə yetirilməyən işlərə görə ayrılmış vəsaitlər büdcəyə qaytarılmışdır".
Xatırladaq ki, Respublika Seysmoloji Xidmət Mərkəzinin baş direktoru Qurban Yetirmişlidir.
Cahandar Laçınlı
Qlobal.az
