Sabiq rəis QSC-nin büdcəsini darmadağın edib
Fevral 25
01:59
2025
Bakı Metropoliteni QSC-nin külli miqdarda vergi borcu var.
Qlobal.az Qaynarinfo-ya istinadən xəbər verir ki, qurumun sədri Vüsal Aslanovun İqtisadiyyat Nazirliyi yanında Dövlət Vergi Xidmətinin Milli Gəlirlər Baş İdarəsinə 1 721 212.03 manat vergi borcu yaranıb.
Dövlət Vergi Xidməti tərəfindən sözügedən qurumda aparılan səyyar vergi yoxlamaları zamanı "Bakı Metropoliteni” QSC barəsində 3 985 391.5 manat maliyyə sanksiyası tətbiq edilib.
Qeyd edək ki, ötən ilin dekabrında Zaur Hüseynov Bakı Metropoliteni QSC-nin sədri vəzifəsindən azad edilib, yerinə Vüsal Aslanov təyin olunub. Yoxlamalar Z.Hüseynovun vəzifədə olduğu dövrü əhatə edib.
Xatırladaq ki, daha əvvəl Bakı Metropoliteni QSC-də Hesablama Palatası tərəfindən həyata keçirilən kənar dövlət maliyyə nəzarəti tədbiri nəticəsində nöqsanlar aşkarlanmışdı.
Hesablama Palatası Bakı Metropoliteni QSC-də apardığı audit nəticəsində sərnişindaşımanın maya dəyərinin süni şəkildə artırıldığı üzə çıxıb. Məlumatda deyilirdi ki, audit nəticəsində müəyyən edilib ki, sərnişindaşıma fəaliyyəti üzrə subsidiyalar düzgün tənzimlənməyib. Belə ki, yaranan sərbəst vəsaitlər əsaslandırılmadan muzdlu işçilərə fərdi mükafat adı ilə ödənilib. Bu ödənişlər gəlirdən çıxılan xərclərə aid edilərək sərnişindaşıma xidmətlərinin maya dəyərinin artmasına səbəb olub.
Buna görə sabiq rəisin haqqında cinayət işinin açıla biləcəyi haqda ekspertlər arayış vermişdilər.
Zaur Hüseynovun fəaliyyətinin yoxlanması ortaya dəhşətli faktlar çıxarır. Bu adam işlədiyi dövrdə metro təsərrüfatını demək olar, məhvə sürükləyib, iflic edib.
Metropoliten dövlətin strateji müəssisələrindəndir. İnanmaq olmur ki, bu cür məsuliyyətsiz, tamahkar bir adam 10 il Bakı Metropoliteni QSC-ə rəhbərlik edib.
Əslində Z.Hüseynovun fəaliyyətində indiyə kimi aşkarlanmış qanun pozuntuları, maliyyə yeyintiləri onun həbsini qaçılmaz edir.
Qlobal.az
