Qardaşı nazir müavini, qayınatası isə... - Evi olmadığını deyən deputatla bağlı maraqlı məlumatlar yayıldı
Noyabr 20
11:15
2021
"Azərbaycanda kirayədə yaşayan deputatlar içərisində Emin Hacıyevin də adı çəkilir. Yəqin ki, bir çoxları belə bir deputatın mövcudluğundan xəbərsizdir. İddia edirlər ki, o, imkansızdır və kirayədə yaşayır. Onun qardaşı Fərhad Hacıyev Gənclər və İdman nazirinin müavini vəzifəsində çalışır. Fərhad Hacıyevin də qaynatası ölkənin ən böyük marketlər şəbəkəsindən birinin sahibidir. Nazir müavinlərinin, onların qardaşlarının, ailə üzvlərinin maddi vəziyyəti isə hər kəsə bəllidir”.
Bunu jurnalist Samir Feyruzov bildirib.
S.Feyruzov qeyd edib ki, Emin Hacıyev hələ 2008-ci ildə "Azərbaycanda ipoteka mənzil kreditləşməsinin formalaşması və inkişafı” mövzusunda namizədlik dissertasiyası yazıb: "Maraqlıdır, ev almağın yollarını araşdırıb bu sahədə alimlik dərəcəsi alan adam indiyə qədər necə evsiz qalıb? Özü də əvvəllər nazirlikdə, baş konsulluqda işləyəsən, qardaşın nazir müavini ola, tikinti maqnatı olan xeyli dostların da sənin qulluğunda dura... Gülməlidir, deyilmi?! Yaxşısı budur, digər "evsiz” deputat Şahin Seyidzadə kimi "siz kirayədə qalırsınızmı?” sualına belə cavab verəsən: "Adıma ev və mənzil yoxdur...””
Qeyd: Milli Məclisin mətbuat xidməti yayılan məlumata münasibət bildirib. MM-dən Qlobal.az-a verilən məlumatda deputat Emin Hacıyevin adının kirayədə yaşayan deputatların siyahısında olmadığı bildirilir.
Qlobal.az
