Perinatal Mərkəzdə baş verən yanğında 177 min manatlıq avadanlıqlar sıradan çıxıb - MƏHKƏMƏ
Dekabr 16
13:47
2024
Respublika Perinatal Mərkəzində baş verən yanğınla bağlı məhkəmə prosesi keçirilib.
"Report"un məlumatına görə, Bakı Ağır Cinayətlər Məhkəməsində hakim Leyla Əsgərova-Məmmədovanın sədrliyi ilə keçirilən prosesdə mərkəzin keçmiş direktoru Mehriban Abasquliyevanın məhkəməyə göndərdiyi ərizə elan olunub.
O, ərizəsində yanğınla bağlı izahat verib, yanğın təhlükəsizliyi texnikalarına baxış keçirilməsini istəyib.
Bildirib ki, texniki işlərə baxan növbədə olan şəxslər yerlərində olmayıblar, yanğın baş verəndən sonra onların harada olmaları barədə videogörüntülər var. O, həmin görüntülərin araşdırılmasını istəyib.
Daha sonra dövlət ittihamçısı ittiham aktını elan edib. İttihama görə, mərkəzdə baş verən yanğında 177 min manatlıq tibbi cihaz və digər avadanlıqlar yanaraq sıradan çıxıb.
İttiham aktı elan olunduqdan sonra təqsirləndirilənlərdən heç biri özünü təqsirli hesab etməyib.
Məhkəmənin növbəti iclası yanvarın 13-də keçiriləcək.
Qeyd edək ki, bu il yanvarın 9-da Respublika Perinatal Mərkəzində PHŞ-nin inzibati binasında baş vermiş yanğınla bağlı Baş Prokurorluqda Cinayət Məcəlləsinin müxtəlif maddələri ilə cinayət işi başlanaraq ibtidai istintaqın aparılması Baş Prokurorluğun İstintaq idarəsinə tapşırılıb.
İstintaqla müəyyən olunub ki, Mərkəzin Anesteziologiya, reanimasiya və intensiv terapiya şöbəsinin Yenidoğulmuşların intensiv terapiya bölməsinin yerləşdiyi dördüncü mərtəbədəki palatasında baş vermiş yanğın nəticəsində 7 yeni doğulmuş ölüb, 4 nəfər xəsarət alıb, müəssisəyə isə ümumilikdə 361 min manat məbləğində maddi ziyan vurulub.
