Neft fondu Çində pul itirə bilər
Oktyabr 31
12:31
2015
Qlobal maliyyə böhranı və digər aktual mövzularla bağlı "Saxo Bank”ın valyuta strategiyaları bölməsinin rəhbəri Con Hardinin müsahibəsi:
– Bir neçə ay öncə Azərbaycan Respublikası Dövlət Neft Fondu (ARDNF) investisiya portfelinin valyuta səbətinin diversifikasiyasının təmin edilməsi istiqamətində növbəti mərhələ olaraq Çin yuanında investisiyalara başlayıb, dövlət və agentliklərin istiqrazlarının alqı-satqısı və saxlanılmasına dair müqavilə imzalayıb. Çin yuanının gələcək perspektivləri haqda nə düşünürsüz?
– Düşünürəm ki, Çinin valyuta məzənnəsindəki dəyişiklik yuanın daha sərbəst üzən məzənnəyə buraxılmasına doğru atılmış ilk addım idi. Ancaq qeyd etmək lazımdır ki, Çin Xalq Bankı (ÇXB) dərəcələri ehtiyatla tənzimləməyə və cari durumda əhəmiyyətli dəyişikliklərə yol verməməyə çalışacaq. Əgər ÇXB geriyə addım ataraq məzənnənin tənzimlənmə prosesini sərbəst şəkildə bazara həvalə edərsə, güman edirəm ki, Çin valyutası digər Asiya valyutaları ilə uyğunlaşmaq üçün daha 10-15% devalvasiya edə bilər. Hazırda Çin valyutası ABŞ dollarını izləməklə digər valyutalarla müqayisədə çox möhkəmdir. Ümumi mənzərədə yuan minimum göstəriciyə yaxınlaşan Yaponiya yeni ilə müqayisədə əhəmiyyətli dərəcədə möhkəmdir.
– Çinin iqtisadi durumu və valyutasının inkişaf perspektivlərini nəzərə alaraq ARDNF-in yatırımının 2016-cı il, həmçinin uzunmüddətli dövr üçün perspektivlərini necə qiymətləndirirsiz?
– Çin valyutası üzrə proqnozlarıma əsaslansaq düşünürəm ki, yuanla yatırılmış investisiyalar gələcək bir-iki il ərzində valyuta devalvasiyası riski səbəbindən müəyyən qədər çətin durumda ola bilər.
– Avronun ucuzlaşmasının uzunmüddətli olacağı gözlənilirmi?
– Fikrimcə, Avropa Mərkəzi Bankı (AMB) kəmiyyət yumşaldılması siyasətini reallaşdırdığı dövrün böyük hissəsində avronun digər valyutalarla müqayisədə qeyri-stabilliyi müşahidə olunacaq. AMB-nin prezidenti Mario Draginin son iclasdakı çıxışından isə kəmiyyət yumşaldılması siyasətinin 2017-ci ilin ortalarınadək uzanacağını ehtimal etmək olar.
– EUR/USD məzənnəsi ilə bağlı cari ilin sonunadək proqnozlarınız necədir?
– Avro/dollar məzənnəsi əsasən növbəti dövrlərdə ABŞ iqtisadiyyatı ilə bağlı yayımlanacaq məlumatlar və statistik göstəricilərdən, o cümlədən Federal Ehtiyat Sisteminin (FES) dekabrın 16-da keçiriləcək iclasında faiz dərəcələrinin artırılması məsələsinin müzakirəsinin nəticəsindən asılı olacaq. Avqust və sentyabrda müşahidə edilən zəiflikdən sonra cüzi inflyasiya artımı və əmək haqqı hesabatlarındakı yüksəlişi nəzərə alsaq, dekabrda faiz dərəcələrinin artımı, nəticədə avro/dollar məzənnəsinin 1,05 hüdudlarında, daha "möhkəm” ABŞ iqtisadiyyatı göstəriciləri şəraitində isə məzənnənin sözügedən göstəricidən aşağı olma ehtimalı mövcuddur. İkinci fərziyyə isə AMB-nin dekabr iclasının, kəmiyyət yumşaldılması siyasətinin təsirini nəzərə alır. Bununla yanaşı, ABŞ dolları və Federal Azad Bazar Komitəsi avro/dollar məzənnəsinin müəyyənləşməsində mühüm amillərdir.
– Etibarlı investisiya kimi hansı valyutalara yatırım etmək olar?
– Əgər bazarlarda cari ilin avqustunda Çində müşahidə olunan valyuta devalvasiyası kimi kəskin enmə baş verərsə, FES-in faiz dərəcələrini artırması gözləntiləri səngiyə bilər ki, nəticədə bu proses avro və yenə dəstək olacaq.
Report.
