Qlobal

Sahil Babayevin tabeliyində olan qurumda hansı işlər görülməli idi, hansı işlər görülür... 

Əmək və Əhalinin Sosial Müdafiəsi Nazirliyinin tabeliyində Əmək Bazarı və Sosial Müdafiə Məsələləri üzrə Milli Observatoriyada (bundan sonra – Observatoriya) məsuliyyətsizlik və özbaşınalığın hökm sürdüyü bildirilir. 

Bu barədə Observatoriyadakı adının çəkilməsini istəməyən mənbə "Arqument.az"a məlumat verib. 

Bildirilir ki, əməkdaşları yüksək maaş alan qurumda iş saatları ilə qeyri-iş saatlarının fərqi bilinmir. Belə ki, Əmək və Əhalinin Sosial Müdafiəsi Nazirliyinin tabeli qurumunun işçiləri bekarçılıqdan iş vaxtı "nərd çempionatı" keçirməklə məşğuldurlar. 

Milli Observatoriya nə vaxt yaradılıb? 

Azərbaycan Respublikası Prezidentinin 2018-ci il 30 oktyabr tarixli 602 nömrəli Sərəncamı ilə "2019–2030-cu illər üçün Azərbaycan Respublikasının Məşğulluq Strategiyası” təsdiq edilib. 

Həmin strategiyada respublikada əmək bazarında mövcud vəziyyətin dəqiq qiymətləndirilməsi və gələcək meyillərin müəyyən olunması üçün məlumatlara əsaslanan proqnoz sistemi, ekspert rəyləri və hesablamaları əsasında keyfiyyət analizi, ali, orta ixtisas və peşə təhsili məzunları arasında mütəmadi sorğuların keçirilməsi, vakansiyalar bazasının və əmək ehtiyatları balansı üzrə əldə edilmiş məlumatların bir-biri ilə əlaqələndirilmiş təhlili, uzlaşdırılması və monitorinqi nəticəsində müvafiq səmərəli idarəetmə qərarlarının qəbul edilməsi nəzərdə tutulub. 

Əmək və əhalinin sosial müdafiəsi naziri

Bundan sonra ölkə başçısının 2019-cu il 4 iyul tarixli 775 nömrəli Fərmanı ilə əhalinin məşğulluğu və sosial müdafiəsi sahələrində səmərəli idarəetmə qərarlarının qəbul edilməsi üçün monitorinq və proqnozlaşdırma sisteminin yaradılması məqsədilə "Azərbaycan Respublikası Əmək və Əhalinin Sosial Müdafiəsi Nazirliyinin tabeliyində "Əmək Bazarı və Sosial Müdafiə Məsələləri üzrə Milli Observatoriya”nın yaradılması qərara alınıb.


"Beyin Mərkəzi”, yoxsa İdman Klubu? 

Qurum yaradılarkən nizamnamə fondu 1 000 000 (bir milyon) manat təşkil edib  və işsizlikdən sığorta fondunun vəsaiti hesabına formalaşdırılıb.

Ölkədə bütün müəssisə və təşkilatlardan hesablanmış əməyin ödənişi fondunun 0,5 faizi işəgötürəndən, işçinin əməkhaqqının 0,5 faizi olmaqla işçidən işsizlikdən sığorta haqqı tutularaq İşsizlikdən sığorta fonduna ödənilir.

"Nizamnaməsindən görünür ki, əmək bazarı və social sahədə milli strateji düşüncə mərkəzi funksiyası yerinə yetirən bu qurum əmək bazarının cari və perspektiv vəziyyətinin qiymətləndirilməsini həyata keçirməli, əmək bazarında strateji məşğulluq sahələrini, onların gələcək inkişaf meyillərini müəyyən etməli, təhsil müəssisələrinin məzunlarının əmək bazarına adaptasiya vəziyyətini mütəmadi olaraq təhlil etməli, bu sahədə təkmilləşdirmələrin aparılması üçün müvafiq təkliflər verməli, iqtisadiyyatın rəqabətədavamlı kadrlarla təmin edilməsi üçün peşə və ixtisaslara, zəruri bacarıqlara və səriştələrə dair tələbləri müəyyənləşdirməli və gənclərin məşğulluğunun təmin edilməsi istiqamətində "Beyin Mərkəzi” rolunu oynamalı idi. Lakin əfsuslar olsun ki, qeyd olunan strateji istiqamətlərdə fəaliyyət göstərməli olan bu qurumun rəhbərliyi və əməkdaşları iş vaxtı ərzində nərd oynamaqla məşğul olur. Gənclərin işsizlik problemini həll etməli olan, onların məşğulluğunun təmin olunması üçün çıxış yolları axtarmalı olan qurum bu istiqamətdə strateji təhlillər aparmaq və ali rəhbərliyə çıxış yolları təklif etmək əvəzinə daha "strateji” və "daha böyük” işlərlə məşğul olmaqda, nərd taxtadakı daşların konfiqurasiyasını müəyyənləşdirmək üzərində "baş sındırır”, - deyə qurumdakı adının çəkilməsini istməyən şəxs deyib. 

 ""Paraşüt”lə endirilmiş təsadüfi şəxs olan Elnur Səfərli..."

Məlumata görə, bekarçılıqdan təşkil edilən belə nərd çempionatında uduş fondu müvafiq olaraq qalibə - 300 manat, ikinci yerin sahibinə - 200 manat, üçüncü yerin sahibinə isə - 100 manat təşkil edib. 

"Elə buna görə də kifayət qədər yüksək iqtisadi potensialı, resursları, kadr ehtiyatları, məşğulluq yaratmaq qabiliyyəti olan Azərbaycanda ali təhsil müəssisələrinin məzunları ilə iş yerləri Xalq şairimiz Məmməd Arazın təbirincə desək yüz il qoşa atılsa da qoşa düşə bilmir. Çünki müvafiq sahədə səmərəli idarəetmə qərarlarının qəbul edilməsi istiqamətində rəqabətqabiliyyətli fundamental təhlillər təqdim etməli olan qurum rəqabətqabiliyyətli nərd həvəskarları yetişdirməklə məşğuldur", - deyə o bildirib.

Elnur Səfərli

Observatoriya əməkdaşı deyir ki, bu qurumun ilkin yarandığı dövrdə kifayət qədər əhəmiyyətli kadr potensialı mövcud olub, lakin bu quruma "paraşüt”lə endirilmiş təsadüfi şəxs olan Elnur Səfərlinin rəhbərlik etməyə başlayan sonra bu kadr potensialı zaman-zaman deqradasiyaya uğradılıb və uzaqlaşdırılıb. 

"Heç bir elmi dərəcəsi, elmi tədqiqatları və dövlət idarəetmə təcrübəsi olmayan bir şəxsin belə strateji beyin mərkəzinə rəhbərlik etməsi təəəccüblüdür", - deyə o bildirib. 

Onu da qeyd edək ki, Milli Observatoriyanın adı daha öncə mətbuatda müxtəlif xarakterli qalmaqallarla hallandırılıb. 

Observatoriyanın adı əsasən də İdarə Heyətinin üzvü Hasil Abbasovun qurumun sürücüsü, II Qarabağ müharibəsi qazisini istismar etməsi ilə yadda qalıb. 

"Arqument.az" gün ərzində Elnur Səfərli və qurumun rəsmi şəxslərindən mövzu ilə bağlı sorğusuna cavab ala bilməyib.