“Kitabi Dədə Qorqud” Çin dilində nəşr olunub
Aprel 17
13:09
2017
Azərbaycan xalq ədəbiyyatının ən dəyərli nümunəsi, Oğuz türk dastanı – "Kitabi Dədə Qorqud” Çin dilinə tərcümə edilərək kitab halında nəşr olunub. Dastanı Çin dilinə Pekin Xarici Dillər Universitetinin türk dili kafedrasının müdiri, filologiya elmləri doktoru professor Liu Cao tərcümə edib.
Çin Millətlər Universitetinin nəşriyyatında çap olunan kitab iki hissədən ibarətdir. Birinci hissə dastanın 12 boyunun hamısının Çin dilində tərcüməsi verilib. İkinci hissədə dastanın dilinin, onun qrammatikasının tədqiqatı əksini tapıb. Bu tədqiqat həm də professor Liu Caonun doktorluq dissertasiya işi olub.
Bundan başqa, nəşrdə dastanda ən çox istifadə olunan sözlərin, o cümlədən qədim türk dilində mövcud olan sözlərin izahı verilib.
Kitaba ön sözü Azərbaycan Yazıçılar Birliyinin sədri, Xalq Yazıçısı Anar, Türk Dil Qurumunun sədri Mustafa Kaçalin, Çin Millətlər Universitetinin professoru Can Dincin və Çinxay Millətlər Universitetinin professoru Ma Vey yazıb.(Azərtac)
