İlham Əliyev: "Əcnəbilərin Ermənistan tərəfindən döyüşdüyünə dair kifayət qədər dəlillər var"
Noyabr 04
11:55
2020
Bizdə əcnəbilərin Ermənistan tərəfindən döyüşdüyünə dair kifayət qədər dəlillər var. Onlar erməni əsilli olduqlarını deyirlər, lakin birincisi, bunun heç bir fərqi yoxdur. Çünki əgər əcnəbi vətəndaş bir ölkə tərəfindən digər ölkəyə qarşı döyüşürsə, o, muzdludur.
Prezident İlham Əliyev bu fikirləri İtaliyanın "La Repubblica” qəzetinə müsahibəsində səsləndirib.
"Bundan əlavə, onların hamısının erməni olmasına dair bizdə 100 faiz dəlil yoxdur. Biz başqalarının olduğunu bilirik. Bilirik ki, PKK oradadır. Bilirik ki, Yaxın Şərqdən bəzi terrorçular qondarma "Dağlıq Qarabağ ordusu”na qoşulublar. Ona görə də, əfsuslar olsun ki, bu məsələ qətiyyən müzakirə mövzusu (out of picture) deyil. Bu, Azərbaycana qarşı qəsdən törədilmiş hücum barədə siyasi hücum təəssüratı yaradır. Bundan əlavə, ermənilərin bu yalan bəyanatdan sui-istifadə etmələrinin səbəbi odur ki, bizim onları döyüş meydanında məğlub etdiyimizi qəbul etmək onlar üçün yəqin ki, çox ağrılıdır. Onlar 30 il ərzində özlərini elə göstərirdilər ki, məğlubedilməz orduları var. Onlar 30 il ərzində bizim əraziləri təkbaşına işğal etdiklərini deyirdilər, baxmayaraq ki, biz bunun doğru olmadığını bilirik. Beləliklə, biz onlara kimin kim olduğunu sübut etdik”, - deyə Azərbaycan Prezidenti bildirib.
Dövlətimizin başçısı sözünə davam edərək deyib: "Biz sübut etdik ki, onların "guya məğlubedilməz ordusu” əfsanədir, mifdir və bunu qəbul etmək onlar üçün çox ağrılıdır. Lakin onlar artıq öz məğlubiyyətlərini etiraf ediblər. Baş nazir Paşinyan Prezident Putinə məktub göndərərək hərbi yardım xahiş edib. Bu, onların hərbi məğlubiyyətlərini və bizim qələbəmizi qəbul etmələri deməkdir”.
"Azərbaycan tərəfdə mücahidlərin döyüşdüyü barədə deyilənlər doğru deyil. Mən bilmirəm bu məlumat niyə yayılmışdı və hələ də yayılır" - deyə, Prezident İlham Əliyev bildirib.
Bununla bağlı heç bir dəlil, sübut təqdim olunmadığını vurğulayan dövlətimizin başçısı deyib: "Hamısı sözlər idi və bu sözlər münaqişənin ilk günlərində söylənmişdi. Siz (qəzetin müxbiri-red.) Prezident Makronun bununla bağlı bəyanatına istinad etdiniz. Bu, yalnız münaqişənin ilk günlərində idi. O vaxtdan bu yana biz bu cür bəyanatlar eşitməmişik. Bu, birincisi. Heç bir sübut, heç bir dəlil. İkincisi, ehtiyac yoxdur”.
