Fransada Ukrayna bayrağı endirilib - Zelenskinin Qarabağ barədə açıqlamasından sonra
Oktyabr 07
12:19
2023
Fransanın cənub-şərqində yerləşən Vyana şəhərinin (İzer departamenti) hakimiyyəti meriya binasının fasadından Ukrayna bayrağının götürülməsinə qərar verib.
Meriyadan bildirilib ki, bayrağın götürülməsi barədə qərar məlum telefon danışığından sonra, Zelenskinin verdiyi bəyanatlarla əlaqədar qəbul edilib. Ukrayna Prezidentinin Prezident İlham Əliyevlə söhbətində dövlətlərin suverenliyi və ərazi bütövlüyü prinsiplərinə sadiqliyi ilə bağlı son bəyanatları buna səbəbiyyət verib.
Qeyd edək ki, Ukrayna bayrağı 2022-ci ilin fevralında Vyana meriyası binasının fasadında asılmışdı.
Trend xəbər verir ki, buna səbəb Ukrayna Prezidenti Volodimir Zelenskinin Azərbaycan Prezidenti İlham Əliyevlə telefon danışığından sonra Ermənistan və Qarabağla bağlı söylədiyi sözlər olub.
Xatırladaq ki, Zelenski öz "Telegram” kanalında oktyabrın 4-də Prezident İlham Əliyevlə regional təhlükəsizlik, mövcud çağırışlar və qarşılıqlı fəaliyyət formatlarını müzakirə etdiyini bildirib.
"Biz dövlətlərin suverenliyi və ərazi bütövlüyü prinsiplərinə sadiqliyimizi təsdiqlədik”, - deyə Volodimir Zelenski qeyd edib.
