Əbülfəs Qarayev CNN-in Londonda yerləşən ofisində olmuşdur
Noyabr 22
10:26
2015
Xəbər verdiyimiz kimi, Mədəniyyət və turizm naziri Əbülfəs Qarayev 18-20 noyabr tarixlərində Londonda səfərdə olmuşdur.
Səfər çərçivəsində nazir Azərbaycanla sıx əməkdaşlıq edən, dünyanın nüfuzlu televiziya telekanallarından olan CNN-in Londonda yerləşən ofisini kanalın dəvəti ilə ziyarət etmiş və televiziyanın kommersiya üzrə baş direktoru Rani Raat ilə görüşmüşdür.
Görüş zamanı nazir CNN telekanalında Azərbaycan turizmi və mədəni həyatı haqqında qısa reklam çarxlarının mütəmadi yayımı və əlavə proqramların nümayişi ilə bağlı CNN rəhbərinə öz məmnunluğunu ifadə etmişdir.
Daha sonra görüş çərçivəsində növbəti illərdə yayımın coğrafiyasının genişləndirilməsi, yeni strategiyanın müəyyənləşdirilməsi, müasir elektron texnologiyalarla bağlı yeni layihələrin hazırlanması üzrə fikir mübadiləsi aparılmışdır.
CNN-in baş direktoru öz növbəsində mədəniyyət və turizm naziri Əbülfəs Qarayevi CNN-də qəbul etməyin xoş olduğunu ifadə etmiş və gələcəkdə Azərbaycanla əməkdaşlığın daha da inkişaf etdirilməsinə ümidvar olduğunu bildirmişdir.
Xatırladırıq ki, Azərbaycan bir neçə illərdir dünyanın nüfuzlu televiziya kanalları olan CNN, "Euronews”, "Travel Channel”, "National Geographic”, "TV5 Monde” və s. kanallarla sıx əməkdaşlıq edir.
