Belarus ATƏT Parlament Assambleyasının sessiyasına buraxılmayıb
İyun 29
13:33
2024
Belarusun nümayəndə heyəti ATƏT Parlament Assambleyasının Buxarestdəki 31-ci sessiyasına buraxılmayıb.
APA-nın "Беларусь Сегодня”ya istinadən məlumatına görə, bu barədə Parlamentin Mətbuat Xidmətindən məlumat verilib.
Qeyd edək ki, ATƏT Parlament Assambleyasının növbəti sessiyası iyunun 29-dan iyulun 3-dək Rumıniyada keçiriləcək.
Bildirilib ki, rəsmi Buxarest ölkənin qanunverici orqanı təmsil edən deputatlara viza verməkdən imtina edib. Bəyanatda sözü gedən addımın ATƏT-in baza prinsiplərinə zidd olduğu qeyd olunub: "Belarus ATƏT Parlament Assambleyasının iclasında aktiv şəkildə iştirak edir. 2017-ci ildə ölkəmiz qurumun 26-cı sessiyasına uğurla ev sahibliyi edib. Bu zaman 55 ölkəni təmsil edən parlament nümayəndə heyətlərinin fəaliyyəti üçün maksimal dərəcədə əlverişli şərait yaradılıb. Onu da bildiririk ki, ATƏT-in Parlament Assambleyası xüsusilə də hazırkı gərgin siyasi vəziyyətdə önəmli hesab olunan açıq və inklüziv dialoq meydançasıdır. Belarus nümayəndə heyətinin bu toplantının işinə buraxılmaması açıq diskriminasiyanın bariz nümunəsidir. Bu xüsusda Belarus nümayəndə heyəti sessiyanın gedişində ölkəmizə qarşı qəbul ediləcək istənilən qərarı tanımır” – bəyanatda belə deyilir.
