Avropa Parlamentindəki korrupsiyanın böyük miqyası ortaya çıxıb
Dekabr 05
01:41
2023
Avropa Parlamentindəki korrupsiya işi ilə bağlı polis araşdırmasından mətbuata sızan sənədlər 2022-ci ildə qurumda baş verən qalmaqalın bütün miqyasını ortaya qoyur.
Sızdırılan materiallara görə, əsas şübhəlilər, o cümlədən Avropa Parlamentinin üzvü keçmiş Pyer Antonio Panzeri və onun köməkçisi Françesko Ciorci AP-nin fəaliyyətini və siyasi debatları manipulyasiya etməyə çalışıblar.
Onlar Qətər, Mərakeş və Mavritaniyadakı potensial müştərilərdən təxminən dörd milyon avro alıblar.
İstintaq Aİ-nin işinə əhəmiyyətli təsir göstərən fəaliyyətləri sənədləşdirib. Xüsusilə, Qətərdə insan haqlarının vəziyyətini pisləyən altı qətnamənin bloklanması və Doha ilə Aİ ölkələri arasında vizasız gediş-gəliş haqqında sazişin bağlanması üzərindəki iş belə fəaliyyətlərdəndir.
Nəşrin yaydığı fayllar arasında Ciorcinin Brüsseldəki mənzilindən tapılan noutbukun elektron cədvəli də var. O, şübhəlilərin külli miqdarda qonorar aldığı 300-dən çox epizoddan ibarətdir.
Sənədlər göstərir ki, korrupsiya uzun illər ərzində çoxlu sayda insanın iştirakı ilə baş verib və gizli qalıb.
