ABŞ Rusiyanın bazar iqtisadiyyatı olan ölkə statusunu ləğv edir
Noyabr 11
11:43
2022
Birləşmiş Ştatların Kommersiya Departamenti noyabrın 10-da Rusiyanın bazar iqtisadiyyatı olan ölkə statusunu ləğv edib. Bu isə Moskva və Vaşinqton arasında ticarət tədbirlərinin sərtləşməsi, münasibətlərin gərginləşməsi deməkdir.
20 il öncə verilmiş status Rusiya mallarına antidempinq rüsumlarının hesablanmasını məhdudlaşdırmışdı. Bundan sonra ABŞ-ın maliyyə institutları Rusiyaya qeyri-bazar iqtisadiyyatı olan ölkə kimi baxacaqlar.
ABŞ Kommersiya Departamenti Rusiya iqtisadiyyatına hökumətin geniş müdaxiləsini üzə çıxardığını, bunun isə qiymət və xərclərin təhrif olunmasına gətirdiyini bildirib.
"Bu qərar Birləşmiş Ştatlara imkan verir ki, Rusiya hökumətinin öz iqtisadiyyatına artan müdaxiləsinin səbəb olduğu bazar təhriflərini yoluna qoymaq üçün öz antidempinq qanununu tam tətbiq etsin”, – Ticarət Departamenti bəyanatında bildirib.
Vaşinqton Rusiyaya bazar iqtisadiyyatı olan ölkə statusunu 2002-ci ildə verib. Bu isə Rusiyanın 2012-ci ildə Dünya Ticarət Təşkilatına (DDT) qəbulu yolunda əsas addım idi.Bunadək Rusiya qeyri-bazar iqtisadiyyatı olan ölkə sayılırdı, antidempinq rüsumları yüksək idi, ixracatçılar öz maraqlarını müdafiə edə bilmirdilər.
Rusiyadakı Amerika Ticarət Palatası ötən il bildirib ki, Moskva ABŞ-ın Rusiyanı bazar statusundan məhrum etməklə bağlı istənilən qərarını DDT-də mübahisələndirə biləcək.
