Qlobal

Quba Rayon İcra Hakimiyyəti başçısının birinci müavini öz vəzifəsindən istefa verib.

Quba Rayon İcra Hakimiyyətindən Axar.az-a verilən məlumata görə, İcra Hakimiyyətinin birinci müavini Yusif Abidov işdən çıxması ilə bağlı ərizəni bu həftə imzalayıb. Onun işdən ayrılma səbəbi məlum deyil. Y.Abidovun yerinə hələlik heç bir təyinat yoxdur.

Qeyd edək ki, 2 dekabr tarixində Prezident İlham Əliyevin sərəncamı ilə Quba Rayon İcra Hakimiyyətinin başçısı Yaşar Məmmədov tutduğu vəzifədən azad edilmişdi. Y.Məmmədovun yerinə həmin tarixdə Ziyəddin Əliyev təyin edilmişdi.
 
***
 
Qlobal.az-ın əldə etdiyi məlumata görə, Quba rayon İcra Hakimiyyəti başçısının sosial-iqtisadi sahə üzrə müavini Nəsrulla Vəliyevdən də könüllü olaraq işdən çıxması barədə ərizə istənilib. Ancaq Nəsrulla Vəliyevin yeni başçının bu istəyini geri çevirdiyi deyilir. 
 
Xatırladaq ki, Nəsrulla Vəliyev barəsində mətbuatda zaman-zaman neqativ informasiyalar gedib. Bir müddət öncə mətbuat vasitəsilə ölkə rəhbərliyinə ünvanlanan şikayət məktubunda Nəsrulla Vəliyevin bazar alverçisi olduğu, onun belə məsul vəzifədə işləməsinin rayon sakinlərinə baha başa gəlməsi vurğulanırdı.

Şikayət məktubunda qeyd edilirdi: "Quba rayon icra başçısının təsərrüfat işləri üzrə müavini Nəsrulla Vəliyev Azərbaycan müstəqilliyini bərpa edən ilk dövrlərdə Rusiya Fedreasiyasında bizneslə məşqul olub. Fəaliyyəti sahəsinə kriminal aləmdə tanınan şəxslərlə tanışlıq, müxtəlif "razborkalar”da iştirak daxıldir ki, bu da Perm vilayətində Edik kimi tanınan qardaşı Eynullanın kriminal keçmişi ilə bağlıdır. Rusiyada biznes fəaliyyəti zamanı Nəsrulla Vəliyevi küt alətlə vuraraq zibil yeşiyinə atırlar. Uzun müddət axtarıldıqdan sonra zibillikdən təsadüfən sağ tapılır. Ağır kontuziya alan Nəsrulla Vəliyev və qardaşı Eynulla Permdə bizneslə məşqul olan iş adamına 5 milyon dollar pul ataraq Rusiyadan Azərbaycana qaçırlar.

Azərbaycana qayıtdıqdan sonra, Nəsrulla Vəliyev həyatda qalmağını dövlət işilə bağlayıb. Belə ki, o öncə Quba rayonu Vəl-vələ kənd icra nümayəndəsi, 2010-cu ildə Quba şəhəri üzrə nümayəndəsi, daha sonra icra başçısının müavini vəzifəsinə təyin edilir.

Hazırda, Nəsrulla Vəliyevin kurasiyasında- Quba şəhərinin abadlaşdırılmasına nəzarət, sahibkarların örüşlərlə təmin edilməsi və bu sahəyə nəzarət daxildir. Ötən ilin sonlarında intihar edərək dünyasını dəyişən Quba rayonu Xınalıq kənd icra nümayəndəsi Fizuli Şərifovun ölümündə də Nəsrullanın adı hallanmaqdadır. Nəsrulla Vəliyev örüş sahələrini əhatə edən ərazilərin icra nümayəndələri tərəfindən qışlaqdan qayıdan mal-qoyun sürüsü sahiblərindən hər il icra başçısınına haqq toplayır. Həmin tapşırığı təmin etməli olan mərhum Fizuli Şərifov 70000 manat ziyana düşür. Nəsrulla Vəliyev mərhum Fizuli Şərifova banklardan kredit almağı tövsiyə edir və bütün icra nümayəndələrinə bank müqavilələrində zamin durmağı tapşırır. Ölümündən bir müddət əvvəl mərhum Fizuli Şərifov Vladimirovka kəndində yaşayan bacanağının qonşusu məktəbdə xadimə işləyən Rafinad Məmmədovanın adına kredit almış, zamini də Quba rayonu Tüləkərən kənd icra nümayəndəsi Oqtay İsayev olur. Ölümündən sonra isə, alınmış kredit borcu xadimənin adında olduğuna görə, elə xadimənin əmək haqqından tutulur.

Hazırda Quba rayonu ərazisində və Hacıqabul və bir neçə başqa rayonunda, Qubaya aid olan örüş sahələri Nəsrulla Vəliyevin tapşırığı ilə sıxışdırılaraq yerli sakinlərdən alınır. Proses – yerli sahibkarlardan hektarına 500 manat illik rüşvət tələb edilməsi ilə başlanıldı.Buna razı olmadıqları üçün icarə müqavilələri ləğv edilərək həmin torpaqlar imkanlı şəxslərə satılır. 

Aqrar islahat zamanı Səməd Vurğun adına sovxozdan qalan çoxlu yerləri saxtakarlıqla özəlləşdirib. Hazırda Vəl-vələ kəndi ərazisində Nəsrulla Vəliyevə aid daş karyeri, "Qoşa bulaq” istirahət mərkəzi və meyvə tərəvəz saxlanılması üçün soyuducu anbar fəaliyyətdədir. Bundan əlavə, Nəsrulla Vəliyevə məxsus Şabran rayon istiqamətində olan meyvə bağları, mal-qara sürüsü var ki, bütün bunlara nəzarəti qardaşı Eynulla həyata keçirir.

Son 4-5 ildə Nəsrulla Vəliyevin daşınmaz əmlaknın sayı da xeyli artıb. Belə ki, təkcə Quba şəhəri ərazisində 4 mənzili var. Bütün mənzilləri qohumlarının adına rəsmiləşdirilib. Həmin mənzillər Quba şəhəri Vaqif küçəsində, SAF Konserv zavodu ətrafındakı küçədə, Nügədi yolunda, Lisey yaxınlığında yerləşir. Həmin mənzillərin hamısı hazırda kirayədədir. 

Nəsrulla Vəliyevin şəxsi həyatı da qalmaqallarla müşahidə edilir. Qeyd edim ki, əldə etdiyim məlumatlara görə Nəsrulla Vəliyev Rusiyada qeyri-rəsmi nikahdan 2 oğlu dünyaya gəlib və hazırda Perm vilayətində yaşayır.
 
Qubada da Nəsrulla Vəliyevin şəxsi həyatı hay-küysüz ötüşməyib.

Quba rayon camaatının baş ağrısına çevrilən Nəsrulla Vəliyevin qanunsuz əməllərinin araşdırılıb onun barəsində ciddi tədbir görülməsini prezident cənab İlham Əliyevdən və birinci vitse-prezident Mehriban xanım Əliyevadan xahiş edirik".
 
Məlumatın dəqiq olub-olmamasını öyrənmək üçün Quba rayon İcra Hakimiyyəti ilə əlaqə saxladıq. İcra hakimiyyətindən bildirdilər ki, Yusif Abidov iki gün öncə vəzifədən azad edilib. Nəsrulla Vəliyevin işdən azad olunmağı ilə bağlı ərizə yazmağı barədə isə məlumatsızdırlar.
 
Qlobal.Az