SON XƏBƏR

Partiya sədri: "QHT sədrləri qrantdan imtina etsinlər"

Aprel 27
07:15 2017
"QHT-lər onlara ayrılan qrantdan imtina etsinlər, ayrılan vəsaiti dövlət büdcəsinə qaytarsınlar". 

Avrasiya.net xəbər verir ki, bunu Azərbaycan Liberal Demokrat Partiyasının sədri Fuad Əliyev Maliyyə Bazarlarına Nəzarət Palatasının (MBNP) ezamiyyə xərclərinin nağdsız ödənişlərə keçirilməsi ilə bağlı verdiyi qərara münasibətində açıqlayıb.

Partiya sədri bildirib ki, "Nağdsız hesablaşmalar haqqında” qanun fiziki şəxslər, sahibkarlıq subyektləri, bank əməliyyatlarını aparan digər şəxslərə böyük problem yaradır. 

Onun fikrincə, bu qanunun tətbiqi ilə banklar, sahibkarlıq subyektləri, QHT-lərin fəaliyyəti iflic olub: "Vətəndaş cəmiyyətinin formalaşması və inkişafında vətəndaş cəmiyyəti institutlarının xüsusi çəkisi var. Azərbaycanda müəyyən inkişaf yolu keçən vətəndaş cəmiyyəti institutlarının fəaliyyəti bir çox sahədə problemlərin həllinə yardımçı olur. Bu gün ölkədə vətəndaş cəmiyyəti institutlarının fəallığı, vətəndaş cəmiyyəti institutlarının əməkdaşlıq istiqamətləri, ictimai nəzarətin təşkilində QHT-lərin rolu artmaqdadır. Bəs nədən belə bir qərarın qəbuluna göz yumulmalıdır. Dövlət bir yandan QHT-lərə dəstək durur, digər tərəfdən belə qərarlarla onların fəaliyyətini iflic edir".

Partiya sdəri onu da bildirib ki, dünyanın ən aparıcı və demokratik dövlətlərində QHT-lər bu tərzdə sıxışdırılmırlar: "Xarici ölkələrin əksəriyyətində nağdsız hesablaşmalarla bağlı belə qadağalar yoxdur. Maliyyə Bazarlarına Nəzarət Palatasının bu qərarı Konstitusiyaya ziddir".

F.Əliyev sonda qeyd edib ki, QHT sədrləri və üzvləri etiraz aksiyalarına başlamalıdırlar: "Elə həmin palatanın qarşısında. Onun rəhbərliyinə etiraz etməlidirlər ki, niyə bu kimi məsələlərin müzakirəsində vətəndaş cəmiyyəti institutlarının nümayəndələrinin fikirləri nəzərə alınmayıb. Ən sakit halda isə onlara ayrılan vəsaitdən imrina etməlidirlər. Bu da etiraz aksiyasının bir növüdür".


Oxşar xəbərlər

XƏBƏR LENTİ

Facebook