SON XƏBƏR

İqtisadçı: "Azərbaycan, həqiqətən, analoqu olmayan ölkədir"

Mart 21
20:14 2019
Qubad İbadoğlu: "Axı necə ola bilər ki, səs verdiyin büdcədən qəbul olunandan sonra da qrant alasan"

"Milli Məclis üzvünün rəhbərlik etdiyi QHT-lərə səs verdiyi büdcə hesabına maliyyələşən Qeyri-Hökumət Təşkilatlarına Dövlət Dəstəyi Şurasından qrant ayırmaq maraqlar münaqişəsidir".
 


Bunu sosial şəbəkədəki hesabında iqtisadçı Qubad İbadoğlu yazıb. 

O bildirib ki, deputatın əsas işi qanun yaradıcılığı olmalıdır: "Azərbaycan, həqiqətən, analoqu olmayan ölkədir. Bu günlərdə açıqlanmış Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının 2019-cu il 1-ci qrant müsabiqəsinin qaliblərinin siyahısına nəzər salanda ən azında 4 deputatın adı ilə rastlaşdım. Baxmayaraq ki, deputatların əsas işi qanun yaradıcılığı olmalıdır, amma mən yenə də onların qeyri-hökümət təşkilatlarına (QHT) rəhbərlik etmələrində qəbahət görmürəm. Amma Milli Məclis üzvünün rəhbərlik etdiyi QHT-lərə səs verdiyi büdcə hesabına maliyyələşən Qeyri-Hökumət Təşkilatlarına Dövlət Dəstəyi Şurasından qrant ayırmaq maraqlar münaqişəsidir. Axı necə ola bilər ki, səs verdiyin büdcədən qəbul olunandan sonra da qrant alasan. Adı siyahıda keçən bəzi deputatların həqiqətənmi 7 min manat qranta ehtiyacı var? Məgər 7 min manata görə ölkənin qanunlarını pozmağa dəyərmi?".



"Digər tərəfdən də layihənin seçilməsinə məsul olanlar və bu qərarı verənlər bilmirlər ki, açıq maraqlar münaqişəsi yaradan layihələrə illərdir dəstək verməklə hüquqi dövlət qurmaq olmaz. Maraq münaqişəsi yaradan layihələr yalnız Milli Məclis üzvlərinə deyil, həm də Qeyri-Hökumət Təşkilatlarına Dövlət Dəstəyi Şurası üzvlərinə ayrılan qrantlardır. Çünki ikincilər də rəhbərlik etdikləri təşkilatlara qrant verilməsi ilə bağlı qərara özləri də səs verirlər. Qanunun aliliyinə hörmət etmək lazımdır, cənablar!", - İbadoğlu bildirib.

Martın 18-də Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının 2019-cu il 1-ci qrant müsabiqəsinin nəticələrini açıqlayıb. 

Bu barədə QHT Şurası açıqlama yayıb.

Məlumatda deyilir ki, Şuranın qrant müsabiqəsinə 630 müraciət edilib, 596 layihə təsdiq edilib. Qalib gələn layihələrin siyahısı isə 371 olub.///Toplum.Tv
 
Qlobal.az 



Oxşar xəbərlər

XƏBƏR LENTİ

Facebook