İcra başçısı biznesini Türkiyəyə köçürür?!- ŞOK İDDİA
Noyabr 17
00:33
2016
Azərbaycanda
əksər məmurların şəxsi bizneslərinin olduqları hamıya aydındır. Bu barədə illərdir
ki, yerli mətbuatda faktlarla zəngin məlumatlar tirajlanmaqdadır. Məmurların
biznes fəaliyyətləri ilə məşğul olmaları ölkə qanunvericiliyi ilə qadağan olunduğundan
həmin məmurlar bizneslərini yaxın ətraflarının, qohum - əqrabalarının, bəzi
hallarda isə ailə üzvlərinin adlarına rəsmləşdirir və sahib olduqları hüquqi
resursların hesabına kapitallarını daha da zənginləşdirirlər.
Qlobal.az-ın
əldə etdiyi məlumata görə, siyasi vəzifə daşımağına baxmayaraq çoxşaxəli
biznesi olan məmurlardan biri də Cəlilabad RİH-nin başçısı Əziz Əzizovdur. Ancaq
Əziz Əzizov da digər məmurlar kimi biznesinin idarəetməsini yaxın qohumunun - Pərvin Əliyev adlı şəxsin nəzarətinə verib.
Əldə etdiyimiz
məlumatda iddia olunur ki, Pərvin Əliyev uzun illərdən bəridir ki, Əziz
Əzizovun müxtəlif maxinasiyalarla dövlət büdcəsindən mənimsədiyi böyük həcmdə
olan vəsaitləri tikinti sektoruna yatırmaqdadır. Bu məqsədlə də Bakının müxtəlif
yerlərində, xüsusən də Abşeron rayonunun Xırdalan şəhərində bir neçə yaşayış
binası inşa edərək satmışdır.
Məlumatda
daha sonra vurğulanır ki, xeyli müddət tikinti biznesi ilə məşğul olduqdan
sonra şirkətin mühasibat sənədlərini incələyən Əziz Əzizov ticarətin bu sektorunda
qazancın sürətlə zəiflədiyini hiss etdiyindən biznesin profilini dəyişərək
marketlər şəbəkəsi yaratmışdır. Hal-hazırda paytaxtın bir çox ərazilərində və
eləcə də Xırdalan şəhərində yerləşən "Makromart” univermağında Əziz Əzizovun
payı olduğu deyilir.
Əziz
Əzizovla bağlı saytımızın əldə etdiyi digər bir məlumatda isə icra başçısının
biznesini ilin sonunadək qardaş Türkiyəyə transfer edəcəyi bildirilir. Artıq
RİH başçısının adamları bu istiqamətdə hərəkətə keçiblər. Məlumata görə, Türkiyənin
İstanbul şəhərinin bəzi rayon bələdiyyələri ilə görüşlər keçirən Əzizovun
"komandası” burada trikotaj fabriki yaratmaq istəyirlər.
Xatırladaq
ki, Əziz Əzizov 1963-cü ildə
Cəbrayıl rayonunda anadan olmuşdur. M.Əzizbəyov adına Neft və Kimya
Akademiyasının mühəndis ixtisası üzrə bitirmişdir.
1985-1986-cı
illərdə Tramvay parkında xətt sahəsi əmiri ustası, 1986-1987-ci illərdə Tramvay
parkında vaqon bölməsində usta, 1987-1989-cu illərdə Tramvay parkında yol
təhlükəsizliyi müfəttişi, 1989-1990-cı illərdə Tramvay parkında yol
təhlükəsizliyi idarəsinin rəisi, 1990-1992-ci illərdə Tramvay parkında istismar
idarəsinin rəisinin vəzifəsinin icra edən, 1992-1993-cü illərdə Bakı şəhər
Nəqliyyat Departamentinin texniki şöbənin rəisi, 1993-1996-cı illərdə Bakı
şəhər Nəqliyyat Departamentinin hərəkətin təhlükəsizliyi üzrə rəisi
vəzifələrində çalışmışdır.
1996-2006-cı
illərdə Sahibkarlıq fəaliyyəti məşğul olmuşdur.
Sahibkarlıq
fəaliyyətindən isə birbaşa Azərbaycan Respublikası Prezidentinin 8 avqust
2006-cı il tarixli Sərəncamı ilə Cəlilabad Rayon İcra Hakimiyyətinin başçısı
təyin edilib.
Qarşı tərəf
də məsələyə münasibət sərgiləyə bilər.
Qlobal.az