Gəncə sərnişinlərinə haram tikə yedizdirən kimdir? - ŞİKAYƏT
Avqust 22
00:40
2017
"Bakı-Gəncə”,”Gəncə-Bakı”
reysi ilə hərəkət edən avtobus sərnişinləri üzləşdikləri problemlərlə bağlı
Qlobal.az-a şikayət məktubu ünvanlayıblar.
Gəncə
sərnişinləri şikayət məktublarında bildirirlər ki, adıçəkilən marşrut üzrə hərəkət
edən avtobusların böyük əksəriyyəti SOCAR-da yüksək vəzifə daşıyan şəxsə məxsusdur.
Həmin şəxs isə maddi qazancın daha çox əldə edilməsi üçün sərnişinlərə
narahatlıq yaradan bəzi qanunsuzluqlara yol verir.
Məktubda
qeyd olunur ki, Gəncəyə olan sərnişin biletlərinin dövlət qiyməti 5.57 manat
olsa da, sərnişinlər həftənin adi günləri 7 manata, şənbə bazar günləri isə
8-10 manat arası daşınırlar. Şənbə, bazar günləri qeyri-qanuni olaraq biletlərin
8-10 manata satılmasına səbəb isə Azərbaycanın ən gərgin cəbhə bölgəsinə yaxın
olan inzibati mərkəzə - Gəncəyə əsgər valideynləri və yaxınlarının axın etməsdir.
Yaranmış vəziyyətdən süni olaraq yararlanmağa çalışan marşrut sahiblərinə isə nəzarət
mexanizmini həyata keçirən rəsmi qurumlar "göz yumurlar”.
Gəncə
sərnişinlərinin şikayətçi olduqları digər məqam isə, marşrut xətti üzrə hər iki
istiqamətə hərəkət edən avtobusların Kürdəmir rayonu ərazisində eyni məkanda –
"Şəki” restoranında fasilə etmələridir. Müasir gigiyenik şərtlərə uyğun gəlməyən,
antisanitariyanın, bahaçılığın hökm sürdüyü bu restoranda sərnişinlərə murdar
olmuş heyvanların ətindən hazırlanmış yeməklər təklif olunur. Şikayət məktubunda
bildirilir ki, restoranın sərnişinlərə təqdim etdiyi yeməklərin ətindən gələn kəskin
qoxu barədə restoran işçilərinə irad bildirilsə də, onlar bunu restorana
elektrik enerjisinin verilməsində yaranan fasilələrlə əlaqələndirərək bu halın
müvəqqəti xarakter daşıdığını deyirlər. Mövcud vəziyyətlə bağlı avtobus sürücülərinə
"Niyə bu restoranda saxlayırsınız?” deyə, irad bildirən sərnişinlərə isə
sürücülər "yuxarıdan deyilib, biz də burada saxlayırıq” cavabını verirlər.
Məsələyə
Bakı Beynəlxalq Avtovağzalından münasibət öyrənməyə çalışdıq. Gün ərzində mütəmadi
olaraq qurumun rəsmi saytında qeyd olunan +994 12 4997038 nömrəli
əlaqə telefonuna zəng vursaq da, bizi cavablandıran olmadı.
Saytımıza
ünvanlanan şikayət məktubunda qeyd olunan digər iddia ilə, "Şəki” restoranında hazırlanan
yeməklərin ətlərinin mənşəyinin məlum olmaması ilə bağlı Respublika Gigiyena və Epidemiologiya
Mərkəzindən münasibət öyrənməyə çalışdıq. (+99412)
422-35-52 nömrəyə etdiyimiz zəngə cavab verən adının açıqlanmasını istəməyən
şəxs 4211393-ə zəng etməyimizi bildirdi. Bu nömrədən cavab verən şəxs isə mərkəzin
email ünvanına yazılı müraciət etməyimizi istədi. Saytımıza ünvanlanan şikayət
məktubunu Respublika
Gigiyena və Epidemiologiya
Mərkəzinə göndərdikdən sonra isə əlaqə saxlayacaqlarını desələr də, məsələyə
münasibət bildirmədilər.
Mövzunu diqqətdə
saxlayacağıq.
Qlobal.az
