SON XƏBƏR

Gədəbəydə istehsal olunan su daha 3 ölkəyə ixrac ediləcək

Fevral 09
18:24 2018
"Gədəbəy Mineral Suları” MMC-nin istehsal etdiyi məhsullar Bəhreyn, İraq, Rusiya və Belarusa ixrac edilir. Bu ildən isə fabrikin "Gədəbəy” və "Slavyanka” markaları altında istehsal etdiyi məhsulların "Made in Azerbaijan” brendi ilə İran, Pakistan və Qazaxıstana ixracı nəzərdə tutulur

Bu barədə "AzərTAc”a "Gədəbəy Mineral Suları” MMC-nin planlama müdiri Ələkbər Məmmədov məlumat verib.

Bildirilib ki, Gədəbəy Mineral Suları fabriki 2010-cu ildən fəaliyyət göstərir. Prezident İlham Əliyev 2017-ci il avqustun 20-də Gədəbəy rayonuna səfəri zamanı şirkətin yeni limonad fabrikinin açılışında iştirak edib. Gədəbəy rayonunun Zəhmət kəndində, iki hektar ərazidə fəaliyyətə başlayan və ümumi dəyəri 4 milyon manat olan zavodun yaradılmasına İqtisadiyyat Nazirliyinin Sahibkarlığa Kömək Milli Fondu tərəfindən 1,6 milyon manat güzəştli kredit verilib.

Hazırda müəssisədə 0,33, 0,75 və 1,5 litrlik plastik qablarda armud, tərxun, limon və üzüm limonadları istehsal edilir. Limonad istehsalı korpusu 3500 kvadratmetrdir. Buraya anbar və istehsal sahəsi daxildir. Texnoloji xəttin başlanğıcında qablar İtaliya şirkətinin avadanlığı ilə şişirdilir. Limonadın xammalı Almaniyanın "Döhler” şirkətindən alınır və avtomatik sistemdə hazırlanır. İstehsalatda istifadə olunan kompressorlar isə Belçika avadanlığıdır. İstehsal müəssisəsinin fəaliyyətə başlaması ilə 20 nəfər daimi işlə təmin edilib. Hazırda şirkətin Zəhmət kəndində yerləşən hər iki fabrikində ümumilikdə 51 nəfər daimi işlə təmin olunub.

Gələcəkdə fabrikin istehsal həcminin və məhsullarının çeşidinin artırılması, ixrac dairəsinin daha da genişləndirilməsi nəzərdə tutulur.



Oxşar xəbərlər

XƏBƏR LENTİ

Facebook