SON XƏBƏR

Başına 5 milyon dollar qiymət qoyulan İŞİD-in yeni lideri - Erməni, yoxsa...

Yanvar 22
10:24 2020
Əmir Məhəmməd Səid Abdel Rəhman əl-Maul terrorçu qruplaşmanın başına keçdi; Tramp: "Biz Bağdadinin varislərini tanıyırıq və onlar artıq bizim nişangahımızdadır”

İŞİD terror qruplaşmasının yeni başçısı onun ideoloqlarından biri Əmir Məhəmməd Səid Abdel Rəhman əl-Maulə (Abdullah Qardaş kimi də tanın-"YM" ) olub. Bu barədə "The Guardian” qəzeti bildirib.
 
Nəşr Əmir Abdel Rəhmanı ötən il oktyabrın sonunda İdlib əyalətində ABŞ-ın xüsusi əməliyyatının gedişatında zərərsizləşdirilmiş İŞİD-in əvvəlki lideri Əbu Bəkr əl-Bağdadiyə yaxın şəxs adlandırıb. Dövlət Departamenti onun İraq əsilli olduğunu qeyd edərək, əl-Bağdadinin müavinlərindən biri olduğunu açıqlayıb. Britaniya nəşrinin yazdığına görə, İŞİD-in keçmiş və indiki başçıları hələ 2004-cü ildə ABŞ-ın İraqdakı "Kemp-Bukka” düşərgəsində məhkum olarkən tanış olublar. Əmir Abdel Rəhman qruplaşmanın banilərindən biri olub. O, qruplaşmanın ideologiyasının yaradılmasında və bir sıra əməliyyatların planlaşdırılmasında iştirak edib.
Qəzetin məlumatına görə, məhz o, İraqda xristianların məhvinin əsasını qoyub. Yada salaq ki, ABŞ hakimiyyəti əl-Bağdadinin özü və ən yaxın tərəfdarları barədə informasiya verənə 5 milyon dollar mükafat vəd etmişdi.
 


"Yeni Müsavat” bildirir ki, Abdullah Qardaş 1976-cı ildə İraqın Mosul vilayətində bağlı türkmən şəhəri olan Telaferdə dünyaya gəlib. Əsl adı Əmir Məhəmməd Səid Abdel Rəhman əl-Maulədir (bəzi mənbələrdə əl-Mövla kimi göstərilir). Qardaş Mosul Universitetində ilahiyyat təhsili alıb. Onun atasının Mosul məscidlərindən birinin imamı olduğu bildirilir.

"Əlcəzirə” orta məktəbi və liseyində müəllim işləyib. Din dərsləri deyib. Bu səbəbdən də "ustaz”, yəni ərəbcə müəllim ləqəbi alıb. Ancaq xütbələri bir neçə dəfə yerli şiələrin etirazına səbəb olub. Şiələr onun çıxışlarını inanclarına qarşı yanlış ifadələr işlətməsinə görə sevməyiblər. O cümlədən Yezid və Müaviyəni tərifləməsinə etiraz ediblər. Məzhəb mübahisələri yaratdığı üçün məktəbdə sevilməyib. Ancaq müəllimliklə yanaşı, mikroavtobus sürücüsü işləyib. Məzhəb mübahisələrinə görə şagirdlər bir neçə dəfə avtomobilinin təkərlərini boşaldıb, hətta şüşələrini də sındırıblar. Daha sonra İraqda qurulan "Əl-Qaidə”nin yerli qanadına qoşulub və burada 2000-ci illərin əvvəllərində İŞİD-in gələcək lideri ilə həbsxanada tanış olub.

Qeyd edək ki, Abdullah Qardaşın İŞİD liderinin varisi elan olunması haqda xəbərlər 4 il əvvəl yayılıb. Həmin vaxt iddia olunurdu ki, Abdullah Qardaş kimi tanınan İŞİD üzvü qruplaşmanın ikinci adamı, Bağdadinin "sağ əli”dir. Hətta son illərdə bəzi media orqanları İŞİD-i faktiki olaraq Qardaşın idarə etdiyini yazırdı.
Lakin maraqlıdır ki, Türkiyənin Aksaray Universitetinin beynəlxalq münasibətlər üzrə dosenti Ziya Abbas hələ o zaman "Yeni Müsavat”a açıqlamasında İŞİD-in yeni liderinin türkmən olmadığını bildirmişdi. Qəzetimizə açıqlamasında Ziya Abbas Qardaşın vaxtilə ona dərs dediyini və uşaqlıqdan bu adamı tanıdığını demişdi.

Ziya Abbas İŞİD-in yeni liderinin türkmən olmasına inanmadığını da demişdi. Z.Abbas daha sonra daha bir maraqlı fakt da danışmışdı: "Qardaş Şeyxlər aşirəti himayəsində böyüdülmüş bir ailənin övladıdır. Amma əslən hansı millətə mənsub olduğunu bilmirəm. Məsələ ondadır ki, 1915-ci ildən erməni olayları zamanı Anadoludan köçən erməni uşaqları Telaferdə yerli türkmənlər tərəfindən himayəyə alınıb. Bu uşaqlara və onların ailələrinə indi də mənsub olduqları aşirətlərin yetişdirdiyi uşaqlar deyirlər. Qardaşın ailəsi də Şeyxlər aşirəti tərəfindən yetişdirilib. Yəni böyük ehtimalla bu adamın da babası və ya babasının atası erməni olub”.
İŞİD haqda aparılan araşdırmalara görə, terrorçu qrupa rəhbərlik edən ali məqamlı 20 nəfərdən 19-u İraq kökənlidir, yalnız bir nəfər Suriya əsillidir. Suriyalı Taha Sobhz Falaha (Əbu Mohamməd al-Adnani) İŞİD-in media ilə əlaqələrinə görə cavabdehlik daşıyırmış. Buna baxmayaraq, "İslam Dövləti”nin əsas "paytaxtı” uzun müddət Suriyanın Raqqa şəhəri olub.

Rusiya XİN-in 2018-ci ildə yaydığı məlumatda iddia olunurdu ki, İŞİD döyüşçülərinin "əmək haqqı” əvvəllər 1500 dollar olub.

İŞİD ən güclü və populyar vaxtlarında büdcəsi 1 milyard 800 milyon dollara yaxın olub. Suriya və İraqda İŞİD-in vurulub çıxarılması onları bir çox sahələrdən gələn gəlirlərdən məhrum edib.

2010-cu ildə İraqda «Əl-Qaida» təşkilatına rəhbərliyi ələ alıb onu "İslam Dövləti” adlanan xilafətə çevirməyə cəhd edən Bağdadinin həyatı ötən ilin oktyabrında ABŞ xüsusi qüvvələrinin reydi nəticəsində qaranlıq tuneldə bitdi.

İŞİD rəhbəri Əbu Bəkr əl-Bağdadinin aradan götürülməsi üzrə əməliyyatın gedişində altı silahlı, o cümlədən dörd qadın öldürülüb. ABŞ prezidenti Tramp bəyan etmişdi ki, Bağdadinin məhvi Amerikanın terrorçu liderlərə qarşı fasiləsiz təqibini, İŞİD və digər terrorçu təşkilatların məhvi öhdəliyə sədaqətini nümayiş etdirir. "Biz onun varislərini tanıyırıq və onlar artıq bizim nişangahımızdadır”-deyə, Tramp əlavə etmişdi.



Oxşar xəbərlər

XƏBƏR LENTİ

Facebook